ძვირფასო პარტნიორები,

ევროკავშირის, შვედეთის და ავსტრიის ერთობლივი მხარდაჭერით განხორციელებულ პროექტ GRETA-ს სახელით, გვსურს მადლობა გადაგიხადოთ ერთგულებისთვის და ჩვენთან ერთად დაუღალავი შრომისთვის.

2019 წლიდან, მრავალი დაინტერესებული/ჩართული მხარის ერთობლივმა ძალისხმევამ, ევროკავშირის, შვედეთისა და ავსტრიის მნიშვნელოვანმა ფინანსურმა მხარდაჭერამ და სხვადასხვა საერთაშორისო თუ ადგილობრივ ორგანიზაციებთან კოორდინაციამ, საქართველოს მაღალმთიანი რეგიონის რვა მუნიციპალიტეტში, (მესტია, ლენტეხი, ცაგერი, ონი, ამბროლაური, საჩხერე, ჭიათურა, ტყიბული) უამრავი ადამიანის ცხოვრებაში დიდი როლი ითამაშა.

ხანგრძლივი და საინტერესო ერთობლივი მუშაობის შედეგად, მნიშვნელოვანი ნაბიჯები გადაიდგა ორგანული სოფლის მეურნეობის კანონმდებლობის და ტურიზმის სექტორში სტრატეგიული ხედვების შექმნისთვის, გაძლიერდა მცირე მეწარმეები და სხვადასხვა ორგანიზაციები, გაიზარდა ცოდნა ორგანული წარმოების საერთაშორისო სტანდარტების შესახებ, შეიქმნა ინოვაციური ტურისტული პროდუქტები, მცირე მეწარმეები ეზიარნენ ბიზნესის მართვის თანამედროვე ტექნიკებს, ქართული პროდუქტები ამაყად წარსდგა საერთაშორისო ბაზრებზე და სხვა. ამგვარად, პროექტმა ხელი შეუწყო ინკლუზიურ განვითარებას, უზრუნველყო საჭირო რესურსები და მათზე ხელმისაწვდომობა.  

ევროკავშირის, შვედეთის და ავსტრიის ერთობლივი ინიციატივა პროექტ GRETA-ს სახით მაღალმთიანი რეგიონების განვითარების და ტრანსფორმაციის ერთ-ერთი მნიშვნელოვანი მამოძრავებელი ძალა გახდა. ხუთწლიანი შრომის შედეგად, პროექტმა და პარტნიორებმა მნიშვნელოვან შედეგებს მიაღწიეს და ახლა უკვე:

• ქართული კანონმდებლობა ევროკავშირის განახლებულ ორგანულ რეგულაციებთან ჰარმონიზებულია.
• სვანეთის რეგიონს აქვს ტურიზმის განვითარების გრძელვადიანი გეგმა.
• სვანეთის რეგიონში წარმატებით ფუნქციონირებს DMO - დანიშნულების მართვის ორგანიზაცია: www.svaneti.org.
• საქართველოში რეგიონის ბრენდის შექმნის პირველი პრეცედენტი წარმატებით დასრულდა. სვანეთს აქვს ბრენდი კონცეფციით - “საქართველოს დამალული საგანძური”.
• საქართველოს მაღალმთიან რეგიონში, 66 მცირე და საშუალო მეწარმე წარმატებით ფუნქციონირებს.
• 50-მდე მცირე და საშუალო მეწარმემ, საერთაშორისო გამოფენებზე მონაწილეობით, ქართული ბიო პროდუქტები წარადგინა და წარმატებული ბიზნეს კავშირები დაამყარა.  
• საერთაშორისო გამოფენებში მონაწილეობით, ადგილზე საერთაშორისო ზამთრის და ზაფხულის ფესტივალებით, სვანეთმა წარმატებით დაიკავა ადგილი მსოფლიო ტურიზმის რუკაზე.
• ჩაის და ღვინის ასოციაციები დაფუძნდა და წარმატებით ფუნქციონირებს.
• შეიქმნა 9 ინოვაციური ტურისტული პროდუქტი.
• ადგილობრივ ბაზარზე მოღვაწე მცირე და საშუალო მეწარმეებს შორის, სამომავლო თანამშრომლობის 15 მემორანდუმი გაფორმდა.
• 300-ზე მეტი მცირე და საშუალო ტიპის მეწარმე საქართველოს მაღალმთიანი რეგიონებიდან ფლობს მარკეტინგის, ბრენდინგის და სხვა კომერციული საქმიანობის მართვის უნარებს.
• დღეს საქართველოში 20 პროფესიონალი და სერტიფიცირებული სამთო გამყოლი წარმატებით მოღვაწეობს და მათი პროფესია გაუთანაბრდა საერთაშორისო სტანდარტებს.
• 30-მდე კერძო თუ საჯარო ბიზნესის წარმომადგენლებმა შეისწავლეს ბიო წარმოების სპეციფიკა.  

ამ და სხვა მიღწევების გაზიარებისა და აღნიშვნის მიზნით, 18 ოქტომბერს, მესტიაში პროექტის შედეგების შემაჯამებელი ღონისძიება გაიმართა სახელწოდებით „გზა ახალი მწვერვალებისკენ!“, სადაც ერთ სივრცეში გავერთიანდით ყველა დაინტერესებული / ჩართული მხარე და საერთო პერსპექტივით დავინახეთ აღნიშნული რეგიონების განვითარების სამომავლო გზებს.  

მათ ვინც ვერ მოახერხა ადგილზე დასწრება, პროექტის გუნდი პარტნიორ საინიციატივო ჯგუფთან ერთად, მიმდინარე დღეებში გაგიზიარებთ საინტერესო და სასარგებლო ინფორმაციას აღნიშნული ღონისძიების შესახებ.  

***

პროექტი GRETA | „მწვანე ეკონომიკა: მდგრადი სამთო ტურიზმი და ორგანული სოფლის მეურნეობა“ ევროკავშირის, ავსტრიისა და შვედეთის მხარდაჭერით, საქართველოში ავსტრიის განვითარების სააგენტო ახორციელებს. პროექტი მიზნად ისახავს ბიზნეს-გარემოს გაუმჯობესების ხელშეწყობას და დამატებითი შემოსავლის შექმნის შესაძლებლობის გაზრდას საქართველოს ეკონომიკის ორ ისეთ მნიშვნელოვან სექტორში, როგორიცაა სამთო ტურიზმი და ორგანული სოფლის მეურნეობა.

ეს მასალა მომზადებულია ევროკავშირის, შვედეთის და ავსტრიის თანადაფინანსებით, პროექტ GRETA-ს ფარგლებში. მის შინაარსზე სრულად პასუხისმგებელია ავსტრიის განვითარების სააგენტო/პროექტი GRETA და შესაძლოა, რომ იგი არ გამოხატავდეს ევროკავშირის, შვედეთის და ავსტრიის შეხედულებებს.